ئاتاقلىق دىنىي ئالىم، مەشھۇر جامائەت ئەربابى ھەبىبۇللاھ خان مەخسۇم قاغىلىق ناھىيىسىدە ئەينى زاماندىكى قاغىلىق مۇپتىسى راشىدىن مۇپتى ھاجىم ئائىلىسىدە دۇنياغا كەلگەن. كىچىكىدىن باشلاپ ئىلىمگە ھىرىسمەن بولۇپ، ئۆز يۈرتىدا ئوقۇپ، مەلۇم سەۋىيىگە ئىگە بولغاندىن كېيىن، 1955 ـ يىلى بېيجىڭدىكى جۇڭگو ئىسلام ئىنىستوتىغا قۇبۇل قىلىنىپ، مەزكۇر ئىنىستۇتقا مىسىردىن ئۇستازلىققا تەكلىپ قىلىنغان ئالىملاردىن تەلىم ئېلىپ دىنى ئىلىملەرنى تەھسىل قىلغاننىڭ سىرتىدا ، ئەرەبچە ھەم خەنزۇچە تىللارنى ئۆگەنگەن.

 مەرھۇم ھەبىبۇللاھ خان مەخسۇم ھاجىم، مەرھۇم دىنى ئالىم ئابدۇلھەكىم مەخسۇم ھاجىمدىن كېيىنكى، پۈتكۈل رايۇنىمىزدا جۈملىدىن قاغىلىقتا ئالدىنقى قاتاردا تۇرىدىغان دىنى ئالىم ۋە جامائەت ئەربابى ئىدى، مەرھۇم ھەبىبۇللاھ خان مەخسۇم 1990 ـ يىللىرى "شىنجاڭ ئىسلام ئىنىستوتى"غا ئۇستازلىققا تەكلىپ قىلىنىپ ئۇ يەردە بىر يىلغا قەدەر ئوقۇتقۇچىلىق قىلغان. كېيىن ئوتتۇرا ئاسىيا دۆلەتلىرى، مىسىر ۋە سەئۇدى ئەرەبىستان قاتارلىق بىر قانچە ئەللەرنى زىيارەت قىلغان.

مەرھۇم بۇ يىل 5 ـ ئاينىڭ 28 ـ كۇنى كېسەللىك سەۋەبى بىلەن 70 يېشىدا قاغىلىقتا ۋاپات بولۇپ، يەكشەنبە كۇنى ئەتتىگەندە ئۆز يۇرتىدا دەپنە قىلىنغان.